Служыць Радзіме

Гімназія № 10 Гродна першай у вобласці пачала практыкаваць экскурсіі ў ваенныя ўстановы адукацыі, што стала важнай часткай комплекснага патрыятычнага выхавання. 

Запамінальным стала наведванне Гродзенскага абласнога кадэцкага вучылішча навучэнцамі 7-х класаў. Гімназісты азнаёміліся з рэжымам дня кадэтаў, у асабістай размове з імі даведаліся пра патрабаванні да паступлення. Кадэты расказалі дзецям пра тое, што яны не толькі зай­маюцца ваеннай падрыхтоўкай, але і рыхтуюцца да алімпіяд, навукова-практычных канферэнцый, творчых конкурсаў, займаюцца музыкай, вакалам, танцамі. Яркія ўражанні засталіся ў школьнікаў пасля наведвання музея гісторыі войска, многія задумаліся аб сваім будучым шляху.

Педагогі, якія суправа­джалі гімназістаў, адзначылі важнасць падобных мерапрыемстваў. Яны дазваля­юць навучэнцам адчуць сваё дачыненне да грамадства, пазнаёміцца з аднагодкамі, якія вырашылі змяніць жыццё, вызначыўшы сваёй галоўнай мэтай служэнне Ра­дзіме.

Якуб Колас пісаў: “Няма ў чалавека нічога прыгажэйшага і даражэйшага за ра­дзіму. Чалавек без радзімы — жабрак чалавек”. А з чаго пачынаецца Радзіма? Педагогі і навучэнцы гімназіі № 10 Гродна лічаць, што Ра­дзіма — гэта не толькі месца, дзе яны нарадзіліся, дзе жывуць іх блізкія, але і ўстанова адукацыі. Гімназія — гэта цэлы свет, які злучае разам мінулае і сучаснасць, які ўплывае на фарміраванне будучыні. Таму патрыятычнае выхаванне ў гімназіі ўяўляе сабой адзіны комплекс, які ўключае прававы, духоўна-маральны, праф­арыентацыйны, грамадзянскі напрамкі, што рэалізуюцца ва ўрочнай і пазаўрочнай дзейнасці. Сучасная стратэгія выхавання вучняў грунтуецца на выхаванні грама­дзяніна-патрыёта з актыўнай пазіцыяй, добрага, справядлівага, любячага Айчыну. Менавіта таму на першы план выходзіць патрыятычнае выхаванне школьнікаў, накіраванае на фарміраванне пачуцця адказнасці не толькі за сябе, але і за краіну.

З красавіка 2021 года ў гімназіі функцыянуе віртуальная Instagram-пляцоўка. Яе аўтарамі сталі навучэнцы, якія стварылі інтэрнэт-праект “Гартаючы гераічныя старонкі Пераможнай Вясны”. 

У прамым эфіры, ахапіўшы маладзёжную аўдыторыю краіны, школьнікі стваралі пазнавальны кантэнт на старонках крэатыўнай пляцоўкі (#Стужка_Памяці #У_сэрцах_Памяць_захаваем…). Дзеці разважалі аб памяці пакаленняў, спрабавалі зразумець, якія фактары ўплываюць на фарміраванне асабістага стаўлення да Перамогі, дзяліліся сваімі ведамі аб ваенным дзяцінстве родных, дзякавалі ветэранам і працаўнікам тылу. Удзел у падобных праектах дазваляе сучасным навучэнцам зразумець, што вайна закранула кожную сям’ю, таму важна захоўваць па­мяць аб гэтай вайне. 

Каманда медыяцэнтра стала пераможцай абласнога этапу Рэспубліканскага культурна-патрыятычнага марафону “Глядзі і памятай”. Відэаролікі і кінаафішы гімназістаў па выніках рэгіянальных адбораў размешчаны на сайце Нацыянальнага інстытута адукацыі.

Актыўна працуе ў гімназіі і клуб ваенна-патрыятычнага выхавання, на базе якога праходзіць падрыхтоўка да гульні “Зарніца”. У 2021 годзе каманда “Пераемнікі Перамогі” заваявала дыплом ІІ ступені.

Ірына ГАЛЬВІНА,
кіраўнік медыяцэнтра “МедыяІдэя на 10” гімназіі № 10 Гродна.
Фота Алесі СТАНКЕВІЧ, 
карэспандэнта медыяцэнтра, вучнаніцы 8 “Б” класа гімназіі № 10 Гродна.