Мастацтва дорыць прыгажосць

Не сакрэт, што вельмі цяжка фарміраваць эстэтычныя ідэалы, мастацкі густ, калі чалавечая асоба ўжо склалася. Каб дарослы чалавек быў духоўна багатым, трэба звярнуць увагу на яго эстэтычнае выхаванне яшчэ ў дашкольным і малодшым школьным узросце.

Сутнасныя маральна-эстэтычныя якасці асобы закладваюцца ў раннім перыядзе дзяцінства і захоўваюцца ў больш ці менш нязменным выглядзе на ўсё жыццё. Эстэтычнае выхаванне і адукацыя не толькі адкрываюць душу маленькага чалавечка насустрач гукам, фарбам, формам свету, але і ў цэлым спрыяюць больш поўнаму, больш глыбокаму разуменню свету і больш гарманічнаму, усебаковаму раскрыццю. Менавіта гэта і з’яўляецца адной з задач нашага педагагічнага калектыву Гродзенскага раённага СПЦ. Эстэтычны густ, а значыць і прыгажосць выхоўваюць педагогі на занятках па інтарэсах. Прыгожыя і незвычайныя работы: сувеніры, паштоўкі, вырабы з розных матэрыялаў, малюнкі ў рознай тэхніцы выканання атрымліваюцца ў дзяўчынак і хлопчыкаў. На прагулках і экалагічных мерапрыемствах выхаванцы вучацца бачыць прыгажосць у прыродзе: калi распускаюцца пяшчотна-зялёныя лісцікі вясной і потым, ярка-чырвоныя, жоўтыя, карычневыя восенню; захады сонца; непрадказальныя павароты бягучага ручайка; лунанне птушак у небе…

З прыходам вясны і да глыбокай восені ідзе работа па акультурванні тэрыторыі, якая прылягае да прытулку. А якія святы праходзяць у нас у цэнтры!

Але не толькі з дапамогай заняткаў па інтарэсах, экалагічных прагулак, ранішнікаў, на якіх фарміруецца патрэба дзетак у творчасці і творчым самавыяўленні праводзіцца эстэтычнае выхаванне, а і ў атмасферы, якая іх акружае: гэта з густам абстаўленыя групавыя і спальныя пакоі; пакой псіхалагічнай рэабілітацыі; актавая зала.

Ганна ПЕРАЛОМЕЦ,
выхавальнiк Гродзенскага раённага сацыяльна-педагагiчнага цэнтра.