Лабараторыя здаровага харчавання “ШкольнікАМ”

Ініцыятыва аддзела адукацыі, спорту і турызму Светлагорскага райвыканкама Гомельскай вобласці “Лабараторыя здаровага харчавання “ШкольнікАМ” стала пераможцай ІІ конкурсу ініцыятыў “Будзь здаровы!” у рамках рэалізацыі праекта “Прафілактыка неінфекцыйных захворванняў, прасоўванне здаровага ладу жыцця і падтрымка мадэрнізацыі сістэмы аховы здароўя ў Рэспубліцы Беларусь” (БЕЛМЕД), які фінансуецца Еўрапейскім саюзам і рэалізоўваецца ПРААН, СААЗ і ЮНФПА ў партнёрстве з Міністэрствам аховы здароўя Рэспублікі Беларусь.

Галоўная задача ініцыятывы — сфарміраваць у навучэнцаў, іх законных прадстаўнікоў і мясцовай суполкі рацыянальныя харчовыя паводзіны як складовую частку здаровага ладу жыцця. Вырашэнню гэтай задачы павінен паслужыць цэлы цыкл мерапрыемстваў, у якіх задзейнічаны не толькі педагогі школ, але і самі навучэнцы, іх бацькі, спецыялісты цэнтра гігіены і эпідэміялогіі, урачы цэнтральнай райбальніцы.

Усе мерапрыемствы падзелены на модулі. Адзін з такіх модуляў, які ўключае ў сябе правядзенне дзён здароўя пад дэвізам “Тое, што доктар прапісаў”, прайшоў у дні вясенніх канікул у Давыдаўскім, Асташковіцкім, Нікалаеўскім сельскіх саветах на базе пілотных школ. Мэта гэтага мерапрыемства — прафілактыка неінфекцыйных захворванняў, звязаных з харчаваннем.

Ужо на парогу давыдаўскай школы госці свята траплялі на тэматычную пляцоўку “Здароўю — зялёнае святло”, дзе на запясце завязвалі зялёную стужку — сімвал здароўя. Нікога не пакінула абыякавым акцыя “Яблык у падарунак”. Жадаючым прапанавалася адказаць на пытанне бліцвіктарыны пра здаровае харчаванне і атрымаць за правільны адказ яблык у падарунак.

А пачалося свята на ўсіх трох пляцоўках з выступення агітбрыгады “Акадэмія “Еш”, дзе дзеці ў вясёлай, займальнай і музычнай форме расказалі сваім татам і мамам, бабулям і дзядулям пра прынцыпы правільнага харчавання.

Пазнавальнай для дзяцей стала “Гадзіна здароўя” са спецыялістамі Светлагорскага занальнага цэнтра гігіены і эпідэміялогіі пра гігіенічныя асновы харчавання як крыніцу здароўя і правільнага фізічнага развіцця.

Бацькі дзяцей і жыхары сельскага Савета тым часам маглі наведаць грамадскую прыёмную і атрымаць кансультацыю ўрача-педыятра, урача-тэрапеўта, паўдзельнічаць у акцыі “Лічбы здароўя”. Фельчары сельскіх фельчарска-акушэрскіх пунктаў вымяралі жадаючым ціск, рост, вагу, давалі рэкамендацыі па пытаннях, якія ўзнікалі.

Які ж дзень здароўя без спорту і фізічнай культуры?! Палымяная музыка, захопленыя воклічы, яркія афішы вабілі ўсіх у спартыўную залу, дзе пачыналася спартландыя “Быць здаровым — гэта модна!”, удзельнікамі якой сталі дзеці, таты, мамы і педагогі. Перамагла дружба, а ўзнагародай фізкультурнікам сталі вітамінныя прызы — яблыкі, бананы, апельсіны.


Да канца свята ў фае школы вырасла “Сцяна здароўя”: усе, хто наведаў у гэты дзень давыдаўскую, асташковіцкую і дуброўскую школы, выбралі ўпадабаныя цаглінкі, на якіх былі запісаны ці намаляваны карысныя і шкодныя для здароўя прадукты харчавання, і выклалі з іх сцяну. Канечне ж, “Сцяна здароўя” была правільнай! Цудоўнай традыцыяй скончыўся дзень здароўя ў дуброўскай школе — жыхары вёскі, школьнікі, іх бацькі паўдзельнічалі ў пасадцы яблыневага саду.

Дзень здароўя дасягнуў сваёй мэты — і навучэнцы, і іх бацькі, і жыхары засвоілі прынцыпы здаровага харчавання. Для мясцовых жыхароў арганізаваны свабодны доступ да інфармацыі, кансультацый спецыялістаў. Сучасныя формы падачы інфармацыі дазволілі ў нязмушанай атмасферы абмеркаваць з бацькамі і дзецьмі, мясцовымі жыхарамі (не менш за 250 чалавек) тэму важнасці правільнага харчавання як складовай часткі захавання і ўмацавання здароўя, прафілактыкі НІЗ, правільнага падбору прадуктаў для складання дамашняга меню, колькасць вадкасці, якая ўжываецца, і інш. У рамках грмадскіх прыёмных медсёстры ФАПаў вымералі артэрыяльны ціск не менш чым у 150 чалавек з ліку мясцовых жыхароў. Прадстаўнікі мэтавых груп атрымалі кансультацыі ўрача-гастраэнтэролага, гігіеніста, валеолага, узброіліся ведамі пра механізмы ўздзеянняў харчавання на здароўе і прымяняюць іх у штодзённым жыцці.

Значным модулем ініцыятывы з’яўляецца “Акадэмія “Еш” па папулярызацыі здаровага харчавання і прыцягненні моладзі, мясцовай суполкі да здаровага ладу жыцця. Гэты модуль уключае ў сябе конкурс фота- і відэаработ “Чатыры сезоны здароўя”, у якім удзельнічаюць не толькі дзеці трох сельскіх школ і бацькі, але і навучэнцы школ і ўстаноў дадатковай адукацыі раёна. Вынікі гэтага конкурсу будуць падведзены на раённым форуме “PRO-здароўе” на базе Давыдаўскай сярэдняй школы, праграма якога будзе ўключаць навукова-практычную канферэнцыю навучэнцаў па здаровым харчаванні, семінар “Тэхналогія вырошчвання арганічна чыстай агародніны і садавіны”, выставу сельгаспрадукцыі, прадукцыі прадпрыемстваў харчовай прамысловасці раёна, а таксама круглы стол з удзелам урачоў, педагогаў, бацькоў, прадстаўнікоў ПРААН і Еўрапейскага саюза.

У рамках гэтага модуля ў дні летніх канікул на буйных гандлёвых пляцоўках Светлагорска прайшлі флэшмобы “Вітамінная АБВГДэйка”, у падрыхтоўцы якіх паўдзельнічалі 30 навучэнцаў 6—11 класаў устаноў адукацыі — удзельнікаў ініцыятывы “Лабараторыя здаровага харчавання “ШкольнікАМ”. Флэшмоб прыцягнуў увагу да пытанняў ЗЛЖ не менш як 400 чалавек — жыхароў Светлагорскага раёна. Школьнікі песнямі, танцамі, інсцэніроўкамі заклікалі правільна харчавацца. За здаровы лад жыцця выступалі і героі папулярнага мультфільма Маша і Мядзведзь, правёўшы з гледачамі падбадзёрлівую музычную зарадку. Пазнавальная віктарына, яркія прэзентацыі прынцыпаў здаровага харчавання, акцыі “Здароўю — зялёнае святло”, “Лічбы здароўя”, “Упрыгожым неба шарамі”, збор подпісаў “Я — за здаровае харчаванне” не пакінулі абыякавымі ніводнага наведвальніка гандлёвых цэнтраў горада.

Ініцыятывай “Лабараторыя здаровага харчавання “ШкольнікАМ” прадугледжана работа анлайн-школы “Сакрэты здаровай кухні”, у выніку якой будуць распрацаваны і ўкаранёны ў меню школьных сталовых салаты з агародніны, стравы з круп і іншыя. Навучацца і прыменяць на практыцы інавацыйныя тэхналогіі рацыянальнага харчавання 25 кухараў школьных сталовых. Ролікі з відэаўрокамі, майстар-класамі з рэцэптамі страў для снедання, абеду і вячэры на аснове прынцыпаў здаровага харчавання будуць распаўсюджаны ва ўстановах адукацыі Светлагорскага раёна з мэтай папулярызацыі здаровага ладу жыцця.

Рэалізацыя ініцыятывы “Лабараторыя здаровага харчавання “ШкольнікАМ” дазволіць навучэнцам гэтых школ штодзень атрымліваць рацыянальнае харчаванне не толькі ў школе, але і дома. Для павышэння якасці і арганізацыі збалансаванага харчавання школьнікаў, пашырэння асартыменту ежы ў школьныя сталовыя закуплены параканвектаматы, агароднінарэзальна-працірачныя машыны, электрапліты, кандытарская вітрына, вытворчы інвентар. Паколькі давыдаўская школа з’яўляецца цэнтрам рэалізацыі ініцыятывы, у ёй адрамантаваны харчаблок, абедзенная зала, закуплены сталовая мэбля і посуд, а за кошт фінансавання з раённага бюджэту мадэрнізавана вентыляцыйная сістэма.

Пасля заканчэння рэалізацыі ініцыятывы набыты вопыт будзе распаўсюджаны на іншыя ўстановы адукацыі Светлагорскага раёна.

Святлана МАРКЕВІЧ,
дырэктар Давыдаўскай сярэдняй школы Светлагорскага раёна Гомельскай вобласці.

Пакінуць каментарый

Ваш электронны адрас не будзе апублікаваны. Абавязковыя палі пазначаны *

*